(1911) Xacinto Cantarines

link

Yera Xacinto un mozu altu, delgau, flacu, correudu con mas huesu que freba y más pates que barriga, dalgo allombau; y al tentu de los deos podíen cuntase les banielles del renaz, pechu y espaldes.
La fachenda y floreu del mozu Xacinto, non yera el paxiellu de tela á rayes, nin los botinos de goma con punteres rebitiaes: yera un pañuelín collorau qu'enrollaba al so llargu piscuezu, co les puntes ximielgándose so 'l hombru; un gorretu encantiau na vidaya de la mano zurda y un rizu qu' á moo d'un rau de gochu sofitiábase en metá per metá de la frente. Y si ta yera poco too isto entovía llevaba baxo'l brazu una ramiquina d'avellano verde que mialma, mialma, facíalu más garbosu y gayasperu.
Utra cosa tenía Xacinto: utra cosa qu' ansina Dios me salve facíalu ser el regüeyu de tou el llugar: la envidia de los galanes y la dentera de les moces. Xacinto cantaba lo mesmo qu' un anxel.
¡Quien lo diría al ver aquel mozacu llargu y pingón!
Pos mal apanes se ponía un pocoñín cimblau al par de la gaita, carraspiaba, cuspía y ascomenzaba á subir y baxar la nuez cuando del gargüelu aquel sortía como per encantu una voz de Xana, que quedaben plasmaos cuantos la oyien.
Y al cantar una copla, maliciosa voltiando los güeyos añándose so la pata derecha y metiendo'l focicu pel punteru allí yera gustu ver la xente arrodialu y falar plasmaos.
-Canta abondo bien Xacinto.
-El diañu lleve canta que... canta diz un vieyu echándoles de razoneru.
Y el mozu faciéndose 'l desentendíu espurría el gañote y llanzaba utra copla más en malicia entovía.

La mió Telva y' una Telva
la más guapa de les Telves,
lo que yo quiero á mio Telva
llevólo 'n les entreteles.

Pos güeno: allancó'l carru, torcióse la mistá y por poco non tuvo, que les cibielles gufasen n'el alto y los llombos requemasen de les puñaes, golpes y moquetes.
Telva, yera una moza pequeña, prieta y respingada: bien trabada en carnes, llambiduca y faladora. Enrabicose na cabeza el dar amoríos á Xacinto, faciéndolu de rabiar con el fíu de Pericón de la Güeria un rapazucu rellucíu con más llengua que manes; encalecíu y de pocu xeniu.
Falaba Telva, explicativa y agayaspera al par del galán, y Xacinto mirábalos de regüeyu y sin más nin más entama otra copla.

La mió ye una Telva
la más boba de les Telves,
lo que yo quería á Telva
baxó al picu les madreñes

Sonó un palu, llantau en cabeza dura, arremolinose la xente, fuxó Telva per ente les muyeres y ne'l suelu quedó el fíu de Pericón dando berríes y sangrando como un coríu.

Vieyos y mozos arrodien á Xacinto.
-Baxa la flema mozu -diz el vieyu razonador.
-Non t'aforrugues chacho -fala utru
-Telvuca había ser, -tan paxismera ye.
Y Xacinto rucando los dientes, chó pa lante, sin que cantara cantar delgún...

Ye la fiesta del llugar: dí de sol, d'alegría. Restallen los voladores, ruxen les esquiles, sórvise á tarreñaes la sidre, sulten los bolos, casquen les ablanes, llucen los paxiellos nuevos y á la vera d'un matu dos mozos falen calladino y mimoso.
Son Telva y Xacinto. Ella ríyese con so boquina d' anxel, el pónse tiesu so les pates llargues y el pañuelu collorau engaramítase más entovía y la varina d'avellano ta fresca como la mor en sos corazones.

Atardez en la aldea asturiana. Les moces crucien les cañaes, ixuxús al peracabar sos cantares y la gaita sona con su son tembleque.
Xacinto dexó á Telva na puerta de casa allegre y gayaspera, mientres pe la parte d'una sebe pasa un mozu co la cabeza llena de trapos y la cara atristayá.
Xacinto espurre les zanques caleya abaxo y atopa'l gaiteru - ¡Alto! - La gaita ye pa mín solu, pos hoy canto yo pa mín y pa la mió Telva.
-Toca gaiteru, toca y anda, ya verás tu quien ye Xacinto Cantarines.
Y entrambos á dos echen andar y ansi van pe les caleyes y en los montes, valles y barrancos, óyese el eco del cantar amorosu de Xacinto...

La mió Telva y' una Telva
la más guapa de les Telves,
lo que yo quiero á mio Telva
llevólo 'n les entreteles.